នារសៀលថ្ងៃទី២១ ខែមេសា ឆ្នាំ២០២៣ លោកជំទាវ មាន សំអាន ប្រធានគណៈកម្មការទី៨ព្រឹទ្ធសភា អនុប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ និងជាប្រធានក្រុមសមាជិកាព្រឹទ្ធសភា បានអញ្ជើញចូលរួមក្នុងពិធីសំណេះសំណាលជាមួយគ្រូបង្វឹក គ្រូជំនាញជានារី និងកីឡាការិនីជម្រើសជាតិកម្ពុជា ដែលត្រូវចូលរួមប្រកួតកីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ ដែលនឹងឈានចូលមកដល់នាពេលខាងមុខ ហើយកម្ពុជាគឺជាម្ចាស់ផ្ទះ។ ពិធីសំណេះសំណាលនេះ ប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់សម្តេចកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងជាប្រធានសមាគមនារីកម្ពុជាដើម្បីសន្តិភាព និងអភិវឌ្ឍន៍ ដោយមានការអញ្ជើញចូលរួមពីសមាជិកាព្រឹទ្ធសភា រដ្ឋសភា តំណាងក្រសួង ស្ថាប័ន សប្បុរសជន គ្រូបង្វឹក គ្រូជំនួយជានារី ព្រមទាំងកីឡាការីនីជម្រើសជាតិកម្ពុជាសរុបចំនួន៣០៩នាក់។ ពិធីនេះរៀបចំឡើងក្នុងគោលបំណងដើម្បីជំរុញ និងលើកទឹកចិត្តដល់កីឡាការិនីឲ្យប្រឹងប្រែងហ្វឹកហាត់មានឆន្ទៈ និងការប្តេជ្ញាចិត្តខ្ពស់ក្នុងការប្រកួតដោយឈរលើស្មារតីសាមគ្គីភាពជាតិ និងអន្តរជាតិដើម្បីដណ្តើមជោគជ័យជូនប្រទេសជាតិ…។
ប្រភព៖ នាយកដ្ឋានព័ត៌មាន
